اک دوسرے کو جان نہ پائے تمام عمر ۔ ۔ ۔ پروین شاکر

اک دوسرے کو جان نہ پائے تمام عمر

ہم ہی عجیب تھے یا زمانہ عجیب تھا

کھونا تو خیر تھا ہی کسی دن اسے مگر

ایسے ہوا مزاج کا پانا عجیب تھا

۔ ۔ ۔

پروین شاکر

آوارگی کی ساری حدوں سے گزر گیا ۔ ۔ جبار واصف

آوارگی کی ساری حدوں سے گزر گیا

مرنے کے بعد بھی مرا لاشہ نہ گھر گیا

۔ ۔ ۔

پھر کس طرح میں پالتا آزار عشق کا

جب میں جواں ہوا تو مرا باپ مر گیا

۔ ۔ ۔

جبار واصف

یہ رعنائی جو آنکھوں کے لیئے سامان ِ جَلوہ ہے ۔ ۔جون ایلیاء

یہ رعنائی جو آنکھوں کے لیئے سامان ِ جَلوہ ہے

لباس ِ مُفلِسی میں کتنی بے قیمت نظر آتی

یہاں تو جاذبیت بھی ہے دولت ہی کی پَروَردہ

یہ لڑکی ، فاقہ کَش ہوتی، تو بد صورت نظر آتی

جون ایلیا

ہے زباں بھی دل بھی آنکھیں بھی عقل بھی مگر ۔ ۔ احسان دانش

ہے زباں بھی دل بھی آنکھیں بھی عقل بھی مگر

مصلحت بینی انہیں اذنِ عمل دیتی نہیں

اہلِ دولت سے وفا کی آرزو ہے اک نگاہ

ان زمینوں میں محبت پھول پھل دیتی نہیں

۔ ۔ ۔

احسان دانش

مزاج مختلف ہیں چارہ گر،جوہیں میسر ۔ ۔ اعتبار ساجد

مزاج مختلف ہیں چارہ گر،جوہیں میسر

مگر تنہائی ہر لمحہ رفاقت چاہتی ہے 

۔۔۔

یہ سناٹا تو جاں لیوا ہے اب دیوارو در کا 

کسی سے بات کرنے کو طبیعت چاہتی ہے

۔۔۔

اعتبار ساجد

غنچوں کے گریباں لیتا جا پھولوں کی کلاہیں لیتا جا ۔ ۔ عدمؔ

قطعہ

اے زیست کی تلخی کے شاکی صرف ایک نصیحت ہے میری

آنکھوں کی شرابیں پیتا جا زلفوں کی پناہیں لیتا جا

اے موسم گل جاتا ہے اگر پھر اتنا تکلف کیا معنی

غنچوں کے گریباں لیتا جا پھولوں کی کلاہیں لیتا جا

سید عبدالحمید عدم

آپ جب مسکرا کر بولتے ہیں ۔ ۔ عدمؔ

قطعہ

ہنس کے آپ جھوٹ بولتے ہیں

دل میں کتنی مٹھاس گھولتے ہیں

دنیا کتنی حسین لگتی ہے

آپ جب مسکرا کر بولتے ہیں

سید عبدالحمید عدم

مسلسل ترا دھیان آنے لگا ۔ ۔ عدمؔ

قطعہ

امنگوں میں ہیجان آنے لگا 

سمندر میں طوفان آنے لگا 

یہ پہلی علامت نہ ہو عشق کی 

مسلسل ترا دھیان آنے لگا

سید عبدالحمید عدم

ایک ہی خاصیت ہے دونوں کی ۔ ۔ عدمؔ

قطعہ

نوجوانی کے عہدِ رنگیں میں

جز مے ناب اور کیا پینا

ایک ہی خاصیت ہے دونوں کی

تلخ ہے جام، تلخ ہے جینا

سید عبدالحمید عدم

پردہ داری ہی پردہ داری ہے ۔ ۔ عدمؔ

قطعہ

سلسلہ تیری میری باتوں کا

پسِ پردہ ہے جو بھی جاری ہے

پردہ اٹھا تو آگہی ہو گی

پردہ داری ہی پردہ داری ہے

سید عبدالحمید عدم

تلاش کر کے تو خود بتا کہاں ہوں میں ۔ ۔ عدمؔ

قطعہ

اگرچہ تیری نظر کا ہی ترجماں ہوں میں

تری نگاہ سے لیکن ابھی نہاں ہوں میں 

میں ہوں ضرور کہیں تیری بزم میں لیکن 

تلاش کر کے تو خود بتا کہاں ہوں میں

سید عبدالحمید عدم