اے میرے سارے لوگو! ۔ ۔ احمد فراز

اے میرے سارے لوگو!

اب مرے دوسرے بازو پہ وہ شمشیر ہے جو

اس سے پہلے بھی مرا نصف بدن کاٹ چکی

اسی بندوق کی نالی ہے مری سمت کہ جو

اس سے پہلے مری شہ رگ کا لہو چاٹ چکی

پھر وہی آگ در آئی ہے مری گلیوں میں

پھر مرے شہر میں بارُود کی بُو پھیلی ہے

پھر سے "تُو کون ہے میں کون ہوں" آپس میں سوال

پھر وہی سوچ میانِ من و تُو پھیلی ہے

مری بستی سے پرے بھی مرے دشمن ہوں گے

پر یہاں کب کوئی اغیار کا لشکر اترا

آشنا ہاتھ ہی اکثر مری جانب لپکے

میرے سینے میں سدا اپنا ہی خنجر اترا

پھر وہی خوف کی دیوار تذبذب کی فضا

پھر ہوئیں عام وہی اہلِ ریا کی باتیں

نعرۂ حُبِّ وطن مالِ تجارت کی طرح

جنسِ ارزاں کی طرح دینِ خدا کی باتیں

اس سے پہلے بھی تو ایسی ہی گھڑی آئی تھی

صبحِ وحشت کی طرح شامِ غریباں کی طرح

اس سے پہلے بھی تو پیمانِ وفا ٹوٹے تھے

شیشۂ دل کی طرح آئینۂ جاں کی طرح

پھر کہاں ہیں احمریں ہونٹوں پہ دعاؤں کے دیے

پھر کہاں شبنمیں چہروں پہ رفاقت کی ردا

صندلیں پاؤں سے مستانہ روی روٹھ گئی

مرمریں ہاتھوں پہ جل بُجھ گیا انگارِ حنا

دل نشیں آنکھوں میں فرقت زدہ کاجل رویا

شاخِ بازو کے لئے زلف کا بادل رویا

مثلِ پیراہنِ گل پھر سے بدن چاک ہوئے

جیسے اپنوں کی کمانوں میں ہوں اغیار کے تیر

اس سے پہلے بھی ہوا چاند محبت کا دونیم

نوکِ دشنہ سے کھچی تھی مری دھرتی پہ لکیر

آج ایسا نہیں ، ایسا نہیں ہونے دینا

اے مرے سوختہ جانو مرے پیارے لوگو

اب کے گر زلزلے آئے تو قیامت ہوگی

میرے دلگیر مرے درد کے مارے لوگو

کسی غاصب کسی ظالم کسی قاتل کے لیے

خود کو تقسیم نہ کرنا مرے سارے لوگو

- - -

احمد فراز

یہی ھنگامہء سود و زیاں تھا ۔ ۔ احمد ندیم قاسمی

یہی ھنگامہء سود و زیاں تھا

یہی بے رنگ اور بے رَس جہاں تھا

یہی میں تھا، یہی تُم تھے، لیکن

نہ جانے اُن دنوں یہ دل کہاں تھا

۔ ۔ ۔

احمد ندیم قاسمی

پوچھے ہے کیا وجود و عدم اہل شوق کا ۔ ۔ مرزا غالب

پوچھے ہے کیا وجود و عدم اہل شوق کا

آپ اپنی آگ کے خس و خاشاک ہو گئے

۔ ۔ ۔

مرزا غالب

پلا دے اوک سے ساقی جو ہم سے نفرت ہے ۔ ۔ مرزا غالب

پلا دے اوک سے ساقی جو ہم سے نفرت ہے

پیالہ گر نہیں دیتا نہ دے شراب تو دے

۔ ۔ ۔

مرزا غالب

پھونکا ہے کس نے گوش محبت میں اے خدا ۔ ۔ مرزا غالب

پھونکا ہے کس نے گوش محبت میں اے خدا

افسون انتظار تمنا کہیں جسے

۔ ۔ ۔

مرزا غالب

پھر اسی بے وفا پہ مرتے ہیں ۔ ۔ مرزا غالب

پھر اسی بے وفا پہ مرتے ہیں

پھر وہی زندگی ہماری ہے

۔ ۔ ۔

مرزا غالب

پوچھتے ہیں وہ کہ غالبؔ کون ہے ۔ ۔ مرزا غالب

پوچھتے ہیں وہ کہ غالبؔ کون ہے

کوئی بتلاؤ کہ ہم بتلائیں کیا

۔ ۔ ۔

مرزا غالب

بے خودی بے سبب نہیں غالبؔ ۔ ۔ مرزا غالب

بے خودی بے سبب نہیں غالبؔ

کچھ تو ہے، جس کی پردہ داری ہے

۔ ۔ ۔

مرزا غالب

بوسہ دیتے نہیں اور دل پہ ہے ہر لحظہ نگاہ ۔ ۔ مرزا غالب

بوسہ دیتے نہیں اور دل پہ ہے ہر لحظہ نگاہ

جی میں کہتے ہیں کہ مفت آئے تو مال اچھا ہے

۔ ۔ ۔

مرزا غالب

بہت دنوں میں تغافل نے تیرے پیدا کی ۔ ۔ مرزا غالب

بہت دنوں میں تغافل نے تیرے پیدا کی

وہ اک نگہ کہ بہ ظاہر نگاہ سے کم ہے

۔ ۔ ۔

مرزا غالب

بک رہا ہوں جنوں میں کیا کیا کچھ ۔ ۔ مرزا غالب

بک رہا ہوں جنوں میں کیا کیا کچھ

کچھ نہ سمجھے خدا کرے کوئی

۔ ۔ ۔

مرزا غالب

بھاگے تھے ہم بہت سو اسی کی سزا ہے یہ ۔ ۔ مرزا غالب

بھاگے تھے ہم بہت سو اسی کی سزا ہے یہ

ہو کر اسیر دابتے ہیں راہزن کے پانو

۔ ۔ ۔

مرزا غالب

بوسہ کیسا یہی غنیمت ہے ۔ ۔ مرزا غالب

بوسہ کیسا یہی غنیمت ہے

کہ نہ سمجھے وہ لذت دشنام

۔ ۔ ۔

مرزا غالب

بنا کر فقیروں کا ہم بھیس غالبؔ ۔ ۔ مرزا غالب

بنا کر فقیروں کا ہم بھیس غالبؔ

تماشائے اہل کرم دیکھتے ہیں

۔ ۔ ۔

مرزا غالب

بہرا ہوں میں تو چاہئے دونا ہو التفات ۔ ۔ مرزا غالب

بہرا ہوں میں تو چاہئے دونا ہو التفات

سنتا نہیں ہوں بات مکرر کہے بغیر

۔ ۔ ۔

مرزا غالب

بلبل کے کاروبار پہ ہیں خندہ ہائے گل ۔ ۔ مرزا غالب

بلبل کے کاروبار پہ ہیں خندہ ہائے گل

کہتے ہیں جس کو عشق خلل ہے دماغ کا

۔ ۔ ۔

مرزا غالب

بے نیازی حد سے گزری بندہ پرور کب تلک ۔ ۔ مرزا غالب

بے نیازی حد سے گزری بندہ پرور کب تلک

ہم کہیں گے حال دل اور آپ فرماویں گے کیا

۔ ۔ ۔ 

مرزا غالب

بسکہ دشوار ہے ہر کام کا آساں ہونا ۔ ۔ مرزا غالب

بسکہ دشوار ہے ہر کام کا آساں ہونا

آدمی کو بھی میسر نہیں انساں ہونا

۔ ۔ ۔

مرزا غالب

آہ کو چاہیئے اک عمر اثر ہوتے تک ۔ ۔ مرزا غالب

آہ کو چاہیئے اک عمر اثر ہوتے تک

کون جیتا ہے تری زلف کے سر ہوتے تک

۔ ۔ ۔ 

مرزا غالب

آج واں تیغ و کفن باندھے ہوے جاتا ہوں میں ۔ ۔ مرزا غالب

آج واں تیغ و کفن باندھے ہوے جاتا ہوں میں

عذر میرے قتل کرنے میں وہ اب لاویں گے کیا

۔ ۔ ۔

مرزا غالب

بندگی میں بھی وہ آزادہ و خودبیں ہیں کہ ہم ۔ ۔ مرزا غالب

بندگی میں بھی وہ آزادہ و خودبیں ہیں کہ ہم

الٹے پھر آئے در کعبہ اگر وا نہ ہوا

۔ ۔ ۔

مرزا غالب

ایک ہنگامہ پہ موقوف ہے گھر کی رونق ۔ ۔ مرزا غالب

ایک ہنگامہ پہ موقوف ہے گھر کی رونق

نوحۂ غم ہی سہی نغمۂ شادی نہ سہی

۔ ۔ ۔

مرزا غالب

ان آبلوں سے پانو کے گھبرا گیا تھا میں ۔ ۔ مرزا غالب

ان آبلوں سے پانو کے گھبرا گیا تھا میں

جی خوش ہوا ہے راہ کو پرخار دیکھ کر

۔ ۔ ۔

مرزا غالب

آج ہم اپنی پریشانیٔ خاطر ان سے ۔ ۔ مرزا غالب

آج ہم اپنی پریشانیٔ خاطر ان سے

کہنے جاتے تو ہیں پر دیکھیے کیا کہتے ہیں

۔ ۔ ۔

مرزا غالب

اللہ رے ذوق دشت نوردی کہ بعد مرگ ۔ ۔ مرزا غالب

اللہ رے ذوق دشت نوردی کہ بعد مرگ

ہلتے ہیں خود بہ خود مرے اندر کفن کے پاؤں

۔ ۔ ۔

مرزا غالب

اس سادگی پہ کون نہ مر جائے اے خدا ۔ ۔ مرزا غالب

اس سادگی پہ کون نہ مر جائے اے خدا

لڑتے ہیں اور ہاتھ میں تلوار بھی نہیں

۔ ۔ ۔

مرزا غالب

آگے آتی تھی حال دل پہ ہنسی ۔ ۔ مرزا غالب

آگے آتی تھی حال دل پہ ہنسی

اب کسی بات پر نہیں آتی

۔ ۔ ۔ 

مرزا غالب

آہ کو چاہیئے اک عمر اثر ہوتے تک ۔ ۔ مرزا غالب

آہ کو چاہیئے اک عمر اثر ہوتے تک

کون جیتا ہے تری زلف کے سر ہوتے تک

۔ ۔ ۔

مرزا غالب

ابن مریم ہوا کرے کوئی ۔ ۔ مرزا غالب

ابن مریم ہوا کرے کوئی

میرے دکھ کی دوا کرے کوئی

۔ ۔ ۔

مرزا غالب

آ ہی جاتا وہ راہ پر غالبؔ ۔ ۔ مرزا غالب

آ ہی جاتا وہ راہ پر غالبؔ

کوئی دن اور بھی جیے ہوتے

۔ ۔ ۔

مرزا غالب

آئینہ کیوں نہ دوں کہ تماشا کہیں جسے ۔ ۔ مرزا غالب

آئینہ کیوں نہ دوں کہ تماشا کہیں جسے

ایسا کہاں سے لاؤں کہ تجھ سا کہیں جسے

۔ ۔ ۔

مرزا غالب

آتے ہیں غیب سے یہ مضامیں خیال میں ۔ ۔ مرزا غالب

آتے ہیں غیب سے یہ مضامیں خیال میں

غالبؔ صریر خامہ نوائے سروش ہے

۔ ۔ ۔

مرزا غالب

تش دوزخ میں یہ گرمی کہاں ۔ ۔ مرزا غالب

آتش دوزخ میں یہ گرمی کہاں

سوز غم ہائے نہانی اور ہے

۔ ۔ ۔

مرزا غالب

اپنا نہیں یہ شیوہ کہ آرام سے بیٹھیں ۔ ۔ مرزا غالب

اپنا نہیں یہ شیوہ کہ آرام سے بیٹھیں

اس در پہ نہیں بار تو کعبہ ہی کو ہو آئے

۔ ۔ ۔

مرزا غالب

اپنی گلی میں مجھ کو نہ کر دفن بعد قتل ۔ ۔ مرزا غالب

اپنی گلی میں مجھ کو نہ کر دفن بعد قتل

میرے پتے سے خلق کو کیوں تیرا گھر ملے

۔ ۔ ۔

مرزا غالب

اور بازار سے لے آئے اگر ٹوٹ گیا ۔ ۔ مرزا غالب

اور بازار سے لے آئے اگر ٹوٹ گیا

ساغر جم سے مرا جام سفال اچھا ہے

۔ ۔ ۔ 

مرزا غالب

ایماں مجھے روکے ہے جو کھینچے ہے مجھے کفر ۔ ۔ مرزا غالب

ایماں مجھے روکے ہے جو کھینچے ہے مجھے کفر

کعبہ مرے پیچھے ہے کلیسا مرے آگے

۔ ۔ ۔

مرزا غالب

دھر وہ بد گمانی ہے ادھر یہ ناتوانی ہے ۔ ۔ مرزا غالب

ادھر وہ بد گمانی ہے ادھر یہ ناتوانی ہے

نہ پوچھا جائے ہے اس سے نہ بولا جائے ہے مجھ سے

۔ ۔ ۔

مرزا غالب

ان کے دیکھے سے جو آ جاتی ہے منہ پر رونق ۔ ۔ مرزا غالب

ان کے دیکھے سے جو آ جاتی ہے منہ پر رونق

وہ سمجھتے ہیں کہ بیمار کا حال اچھا ہے

۔ ۔ ۔

مرزا غالب

اس انجمن ناز کی کیا بات ہے غالبؔ ۔ ۔ مرزا غالب

اس انجمن ناز کی کیا بات ہے غالبؔ

ہم بھی گئے واں اور تری تقدیر کو رو آئے

۔ ۔ ۔ 
مرزا غالب

یہ کہاں کی دوستی ہے کہ بنے ہیں دوست ناصح ۔ ۔ مرزا غالب

یہ کہاں کی دوستی ہے کہ بنے ہیں دوست ناصح

کوئی چارہ ساز ہوتا کوئی غم گسار ہوتا

۔ ۔ ۔

مرزا غالب

ہیں اور بھی دنیا میں سخن ور بہت اچھے ۔ ۔ مرزا غالب

ہیں اور بھی دنیا میں سخن ور بہت اچھے

کہتے ہیں کہ غالبؔ کا ہے انداز بیاں اور

۔ ۔ ۔

مرزا غالب

واحسرتا کہ یار نے کھینچا ستم سے ہاتھ ۔ ۔ مرزا غالب

واحسرتا کہ یار نے کھینچا ستم سے ہاتھ

ہم کو حریص لذت آزار دیکھ کر

۔ ۔ ۔

مرزا غالب

نہ تھا کچھ تو خدا تھا کچھ نہ ہوتا تو خدا ہوتا ۔ ۔ مرزا غالب

نہ تھا کچھ تو خدا تھا کچھ نہ ہوتا تو خدا ہوتا

ڈبویا مجھ کو ہونے نے نہ ہوتا میں تو کیا ہوتا

۔ ۔ ۔

مرزا غالب

محبت میں نہیں ہے فرق جینے اور مرنے کا ۔ ۔ مرزا غالب

محبت میں نہیں ہے فرق جینے اور مرنے کا

اسی کو دیکھ کر جیتے ہیں جس کافر پہ دم نکلے

۔ ۔ ۔ 

مرزا غالب

لازم تھا کہ دیکھو مرا رستا کوئی دن اور ۔ ۔ مرزا غالب

لازم تھا کہ دیکھو مرا رستا کوئی دن اور

تنہا گئے کیوں اب رہو تنہا کوئی دن اور

۔ ۔ ۔

مرزا غالب

گو میں رہا رہین ستم ہائے روزگار ۔ ۔ مرزا غالب

گو میں رہا رہین ستم ہائے روزگار

لیکن ترے خیال سے غافل نہیں رہا

۔ ۔ ۔

مرزا غالب

کعبہ کس منہ سے جاوگے غالبؔ ۔ ۔ مرزا غالب

کعبہ کس منہ سے جاوگے غالبؔ

شرم تم کو مگر نہیں آتی

۔ ۔ ۔

مرزا غالب

قرض کی پیتے تھے مے لیکن سمجھتے تھے کہ ہاں ۔ ۔ مرزا غالب

قرض کی پیتے تھے مے لیکن سمجھتے تھے کہ ہاں

رنگ لاوے گی ہماری فاقہ مستی ایک دن

۔ ۔ ۔

مرزا غالب

فائدہ کیا سوچ آخر تو بھی دانا ہے اسدؔ ۔ ۔ مرزا غالب

فائدہ کیا سوچ آخر تو بھی دانا ہے اسدؔ

دوستی ناداں کی ہے جی کا زیاں ہو جائے گا

۔ ۔ ۔

مرزا غالب