مجھ سے بنتا ہوا تُو تجھ کو بناتا ہوا میں ۔ ۔ عمار اقبال

مجھ سے بنتا ہوا تُو تجھ کو بناتا ہوا میں

گیت ہوتا ہوا تُو ، گیت سناتا ہوا میں

۔ ۔ ۔

ایک کُوزے کے تصور سے جڑے ہم دونوں

نقش دیتا ہوا تُو ، چاک گھماتا ہوا میں

۔ ۔ ۔

تم بناؤ کسی تصویر میں کوئی رستہ

میں بناتا ہوں کہیں دُور سے آتا ہوا میں

۔ ۔ ۔

ایک تصویر کی تکمیل کے ہم دو پہلو

رنگ بھرتا ہوا تُو ، رنگ بناتا ہوا میں

۔ ۔ ۔

مجھ کو لے جائے کہیں دور بہاتی ہوئی تُو

تجھ کو لے جاؤں کہیں دور اڑاتا ہوا میں

۔ ۔ ۔

اک عبارت ہے جو تحریر نہیں ہو پائی

مجھ کو لکھتا ہوا تُو، تجھ کو مٹاتا ہوا میں

۔ ۔ ۔

میرے سینے میں کہیں خود کو چھپاتا ہوا تُو

تیرے سینے سے ترا درد چُراتا ہوا میں

۔ ۔ ۔

کانچ کا ہو کے مرے آگے بکھرتا ہوا تُو

کرچیوں کو تِری پلکوں سے اٹھاتا ہوا میں

۔ ۔ ۔

عمار اقبال

رات سے جنگ کوئی کھیل نئیں ۔ ۔ عمار اقبال

رات سے جنگ کوئی کھیل نئیں

تم چراغوں میں اتنا تیل نئیں

۔ ۔ ۔

آگیا ہوں، تو کھینچ اپنی طرف

میری جانب مجھے دھکیل نئیں

۔ ۔ ۔

جب میں چاہوں گا ، چھوڑ جاؤں گا

اک سرائے ہے جسم، جیل نئیں

۔ ۔ ۔

بینچ دیکھی ہے خواب میں خالی

اور پٹڑی، پر اس پے ریل نئیں

۔ ۔ ۔

جس کو دیکھا تھا کل درخت کے گرد

وہ ہرا اژدہا تھا، بیل نئیں

۔ ۔ ۔

عمار اقبال

پہلے ہماری آنکھ میں بینائی آئی تھی ۔ ۔ عمار اقبال

پہلے ہماری آنکھ میں بینائی آئی تھی

پھر اس کے بعد قوتِ گویائی آئی تھی

۔ ۔ ۔

میں اپنی خستگی سے ہوا اور پائیدار

میری تھکن سے مجھ میں توانائی آئی تھی

۔ ۔ ۔

دل آج شام سے ہی اسے ڈھونڈنے لگا

کل جس کے بعد کمرے میں تنہائی آئی تھی

۔ ۔ ۔

وہ کس کی نغمگی تھی جو داروں سروں میں تھی

رنگوں میں کس کے رنگ سے رعنائی آئی تھی

۔ ۔ ۔

پھر یوں ہوا کہ اس کو تمنائی کر لیا

میری طرف جو چشمِ تماشائی آئی تھی

۔ ۔ ۔

عمار اقبال