جی میں‌ آئے تو یہ دیوار گرا بھی دینا ۔ ۔ ۔ محسن نقوی

خط بھی لکھنا اسے مایوس بھی رہنا اس سے

جرم کرنا بھی مگر خود کو سزا بھی دینا

مجھ کو رسموں کا تکلف بھی گوارہ لیکن

جی میں‌ آئے تو یہ دیوار گرا بھی دینا

۔ ۔ ۔

محسن نقوی

جس جگہ بولنا واجب ہو ، وہاں بولتا ہے ۔ ۔ ۔ ذوالفقار ذکی

کوئی اس شہر میں الفت سے کہاں بولتا ہے

اب تو ہر شخص ہی نفرت کی زباں بولتا ہے

بحث و تکرار میں رہتا ہے ذکی چپ لیکن

جس جگہ بولنا واجب ہو ، وہاں بولتا ہے

۔ ۔ ۔

ذولفقار ذکی

شب کو تارے مری جانب نگراں رہتے ہیں​ ۔ ۔ مصطفی زیدی

لاکھ لہروں سے اٹھا ہے مری فطرت کا خمیر​

لاکھ قلزم مرے سینے میں رواں رہتے ہیں

دن کو کرنیں مرے افکار کا منہ دھوتی ہیں​

شب کو تارے مری جانب نگراں رہتے ہیں​

۔ ۔ ۔

مصطفی زیدی

وہ انتقام کی آتش تھی میرے سینے میں ۔ ۔ ۔ جمال احسانی

وہ انتقام کی آتش تھی میرے سینے میں

ملا نہ کوئی تو خود کو پچھاڑ آیا ہوں

میں اس جہان کی قسمت بدلنے نکلا تھا

اور اپنے ہاتھ کا لکھا ہی پھاڑ آیا ہوں

- - -

جمال احسانی

یہی ھنگامہء سود و زیاں تھا ۔ ۔ احمد ندیم قاسمی

یہی ھنگامہء سود و زیاں تھا

یہی بے رنگ اور بے رَس جہاں تھا

یہی میں تھا، یہی تُم تھے، لیکن

نہ جانے اُن دنوں یہ دل کہاں تھا

۔ ۔ ۔

احمد ندیم قاسمی

آسماں بھی نہیں' زمیں بھی نہیں ۔ ۔ سعود عثمانی

آسماں بھی نہیں' زمیں بھی نہیں

ہم کہیں بھی نہیں کہیں بھی نہیں

عمر بھر ساتھ ساتھ چلتی رہیں

چند پرچھائیاں جو تھیں بھی نہیں

۔ ۔ ۔

سعود عثمانی