کسی موسم ہوا سے دوستی آغاز کرتے ۔ ۔ جلیل عالی

کسی موسم ہوا سے دوستی آغاز کرتے

پرندے دشت کے سارے شجر ہمراز کرتے

۔ ۔ ۔

اک اوجِ شوق سے گر دیکھتے اِس شہرِ جاں کو

مناظر حیرتوں کے اور ہی در باز کرتے

۔ ۔ ۔

فروزاں تھے لہو میں درد کے مہتاب جتنے

سب اُس کے عکس تھے کس سے کسے ممتاز کرتے

۔ ۔ ۔

بجھا کر آفتاب اب اس کا ماتم کر رہے ہیں

گہن تو اک ذرا سا تھا نظر انداز کرتے

۔ ۔ ۔

یہیں ان وادیوں کی گونج بنتے گیت اپنے

انہی خاموش جذبوں کو جو ہم آواز کرتے

۔ ۔ ۔

کوئی تو سطر عالی کہکشاں صورت چمکتی

کہیں تو سحر کوئی پھونکتے اعجاز کرتے

۔ ۔ ۔

جلیل عالی

ﭨﮭﯿﮏ ﮨﮯ ﺧﻮﺩ ﮐﻮ ﮨﻢ ﺑﺪﻟﺘﮯ ﮨﯿﮟ ۔ ۔ جون ایلیاء

ﭨﮭﯿﮏ ﮨﮯ ﺧﻮﺩ ﮐﻮ ﮨﻢ ﺑﺪﻟﺘﮯ ﮨﯿﮟ

ﺷﮑﺮﯾﮧ ﻣﺸﻮﺭﮮ ﮐﺎ، ﭼﻠﺘﮯ ﮨﯿﮟ

۔ ۔ ۔

 جون ایلیا

وہ دن گزر گئے ، وہ کیفیت گزرتی نہیں ۔ ۔ سعود عثمانی

وہ دن گزر گئے ، وہ کیفیت گزرتی نہیں

عجیب دھوپ ہے دیوار سے اترتی نہیں

۔ ۔ ۔

سعود عثمانی

رنج کتنا بھی کریں ان کا زمانے والے ۔ ۔ سعود عثمانی

رنج کتنا بھی کریں ان کا زمانے والے

جانے والے تو نہیں لوٹ کے آنے والے

۔ ۔ ۔

کیسی بے فیض سی رہ جاتی ہے دل کی بستی

کیسے چپ چاپ چلے جاتے ہیں جانے والے

۔ ۔ ۔

ایک پل چھین کے انسان کو لے جاتا ہے

پیچھے رہ جاتے ہیں سب ساتھ نبھانے والے

۔ ۔ ۔

لوگ کہتے ہیں کہ تو دور افق پار گیا

کیا کہوں اے مرے دل میں اتر آنے والے

۔ ۔ ۔

جانے والے تری مرقد پہ کھڑا سوچتا ہوں

خواب ہی ہوگئے تعبیر بتانے والے

۔ ۔ ۔

ہر نیا زخم کسی اور کے سینے کا سعود

چھیڑ جاتا ہے مرے زخم پرانے والے

۔ ۔ ۔

سعود عثمانی

جب اپنےحرف میں اپنی مراد رکھیے گا ۔ ۔ سعود عثمانی

جب اپنےحرف میں اپنی مراد رکھیے گا

مجھےبھی اپنی دعاؤں میں یاد رکھیے گا

۔ ۔ ۔

سعود عثمانی

آسماں بھی نہیں' زمیں بھی نہیں ۔ ۔ سعود عثمانی

آسماں بھی نہیں' زمیں بھی نہیں

ہم کہیں بھی نہیں کہیں بھی نہیں

عمر بھر ساتھ ساتھ چلتی رہیں

چند پرچھائیاں جو تھیں بھی نہیں

۔ ۔ ۔

سعود عثمانی

دہکتا چھوڑ گیا دل بھی تنگ آکے مجھے ۔ ۔ سعود عثمانی

دہکتا چھوڑ گیا دل بھی تنگ آکے مجھے

چراغ بجھ تو گیا ہے مگر جلا کے مجھے

۔ ۔ ۔

سعود عثمانی

کہیں کچھ اور بھی ہوجاؤں نہ ریزہ ریزہ ۔ ۔ سعود عثمانی

کہیں کچھ اور بھی ہوجاؤں نہ ریزہ ریزہ

ایساٹوٹا ہوں کہ جڑتے ہوئےڈر لگتا ہے

۔ ۔ ۔

سعود عثمانی

یہ رعنائی جو آنکھوں کے لیئے سامان ِ جَلوہ ہے ۔ ۔جون ایلیاء

یہ رعنائی جو آنکھوں کے لیئے سامان ِ جَلوہ ہے

لباس ِ مُفلِسی میں کتنی بے قیمت نظر آتی

یہاں تو جاذبیت بھی ہے دولت ہی کی پَروَردہ

یہ لڑکی ، فاقہ کَش ہوتی، تو بد صورت نظر آتی

جون ایلیا

رہنا نہیں اگرچہ گوارا زمین پر ۔ ۔ جمال احسانی

رہنا نہیں اگرچہ گوارا زمین پر

لیکن اِک آدمی ہے ہمارا زمین پر

۔ ۔ ۔

طُرفہ کہ رمِ گریہ و زاری بھی اُٹھ گئی

مشکل تو پہلے ہی تھا گزارا زمین پر

۔ ۔ ۔

بھٹکے ہوؤں کو راہ دِکھانے کو کم نہیں

ٹُوٹے ہوئے دِیے کا کنارا زمین پر

۔ ۔ ۔

اس کی نظر بدلنے سے پہلے کی بات ہے

میں آسمان پر تھا، ستارا زمین پر

۔ ۔ ۔

باقی تو جو بھی کچھ ہے اضافی ہے سب یہاں

اِک آنکھ ہے اور ایک نظارا زمین پر

۔ ۔ ۔

دیکھا نگاہ بھر کے مجھے اس نے پھر جمال

روشن کیا چراغ، دوبارا زمین پر

۔ ۔ ۔

جمال احسانی