آپ اپنا غبار تھے ہم تو ۔ ۔ جون ایلیاء

آپ اپنا غبار تھے ہم تو

یاد تھے یادگار تھے ہم تو

۔۔۔

پردگی! ہم سے کیوں رکھا پردہ

تیرے ہی پردہ دار تھے ہم تو

۔۔۔

وقت کی دھوپ میں تمہارے لیے

شجرِ سایہ دار تھے ہم تو

۔۔۔

اُڑتے جاتے ہیں دھُول کے مانند

آندھیوں پر سوار تھے ہم تو

۔۔۔

ہم نے کیوں خود پہ اعتبار کیا

سخت بے اعتبار تھے ہم تو

۔۔۔

شرم ہے اپنی بار باری کی

بے سبب بار بار تھے ہم تو

۔۔۔

کیوں ہمیں کر دیا گیا مجبور

خود ہی بے اختیار تھے ہم تو

۔۔۔

جون ایلیاء