شوق ہر رنگ رقیبِ سرو ساماں نکلا ۔ ۔ مرزا غالب

شوق ہر رنگ رقیبِ سرو ساماں نکلا

قیس تصویر کے پردے میں بھی عریاں نکلا

۔۔۔

دلِ حسرت زدہ تھا مائدۂ لذتِ درد

کام یاروں کا بہ قدرِ لب و دنداں نکلا

۔۔۔

شورِ رسوائیِ دل دیکھ کہ یک نالۂ شوق

لاکھ پردے میں چھپا، پھر وہی عریاں نکلا

۔۔۔

شوخیِ رنگِ حنا خونِ وفا سے کب تک

آخر اے عہد شکن، تو بھی پشیماں نکلا

۔۔۔

جوہر ایجادِ خطِ سبز ہے خود بینیِ حسن

جو نہ دیکھا تھا، سو آئینے میں پنہاں نکلا

۔۔۔

تھی نو آموزِ فنا ہمتِ دشواریِ شوق

سخت مشکل ہے کہ یہ کام بھی آساں نکلا

۔۔۔

میں بھی معذورِ جنوں ہوں اسد اے خانہ خراب

پیشوا لینے مجھے گھر سے بیاباں نکلا

۔۔۔

مرزا غالب