پھر آج سرِ شام میں کچھ سوچ رہا ہوں ۔ ۔ عدمؔ

غزل

خالی ہے ابھی جام ، میں کچھ سوچ رہا ہوں

اے گردشِ ایام! میں کچھ سوچ رہا ہوں 

ساقی تجھے اک تھوڑی سی تکلیف تو ہوگی 

ساغر کو ذرا تھام ، میں کچھ سوچ رہا ہوں 

پہلے بڑی رغبت تھی ترے نام سے مجھ کو 

اب سن کے ترا نام میں کچھ سوچ رہا ہوں 

ادراک ابھی پورا تعاون نہیں کرتا 

دے بادۂ گلفام ، میں کچھ سوچ رہا ہوں 

حل کچھ تو نکل آئے گا حالت کی ضد کا 

اے کثرتِ آلام! میں کچھ سوچ رہا ہوں 

پھر آج عدم شام سے غمگیں ہے طبیعت 

پھر آج سرِ شام میں کچھ سوچ رہا ہوں

سید عبدالحمید عدم