یہ کیا کہ سب سے بیاں دل کی حالتیں کرنی​ ۔ ۔ احمد فراز

یہ کیا کہ سب سے بیاں دل کی حالتیں کرنی​

فرازؔ تجھ کو نہ آئیں محبتیں کرنی​

​

یہ قرب کیا ہے کہ تُو سامنے ہے اور ہمیں​

شمار ابھی سے جدائی کی ساعتیں کرنی​

​

کوئی خدا ہو کہ پتھر جسے بھی ہم چاہیں​

تمام عمر اُسی کی عبادتیں کرنی​

​

سب اپنے اپنے قرینے سے منتظر اُس کے​

کسی کو شکر کسی کو شکایتیں کرنی​

​

ہم اپنے دل سے ہیں مجبور اور لوگوں کو​

ذرا سی بات پہ برپا قیامتیں کرنی​

​

ملیں جب اُن سے تو مبہم سی گفتگو کرنا​

پھر اپنے آپ سے سو سو وضاحتیں کرنی​

​

یہ لوگ کیسے مگر دشمنی نباہتے ہیں​

ہمیں تو راس نہ آئیں محبتیں کرنی​

​

کبھی فراز نئے موسموں میں رو دینا​

کبھی تلاش پرانی رفاقتیں کرنی​

احمد فراز​